Ողջունում եմ Ձեզ Հայաստանի աուդիտորների և փորձագետ հաշվապահների պալատի կայքում։

Պալատը միավորում է ոլորտի բոլոր պրոֆեսիոնալներին՝ նպատակ ունենալով բարձրացնել հաշվապահական և աուդիտորական ծառայությունների որակը, ամրապնդել մասնագիտական էթիկայի բարձր չափանիշները և խթանել շարունակական մասնագիտական զարգացումը՝ բարձրացնելով մեր մասնագիտության հեղինակությունն ու հանրային վստահությունը:

Պալատի կայքը հանդիսանում է տեղեկատվական և համագործակցության հարթակ մասնագիտական հանրության համար․ այն նպատակ ունի խրախուսելու փորձի և գիտելիքների փոխանակումը, ընդլայնելու երկխոսությունն ու համագործակցությունը մասնագիտությանն առնչվող բոլոր կողմերի հետ և ապահովելու լայն ներգրավվածություն՝ նպաստելով մասնագիտության զարգացմանն ուղղված նորանոր նախաձեռնությունների  իրագործմանը:

Շնորհակալություն վստահության և հետաքրքրվածության համար:

Թաթուլ Մովսիսյան

Պալատի նախագահ

Հայաստանի աուդիտորների և փորձագետ հաշվապահների պալատը ստեղծվել է 1997թ․-ին։

2005թ․-ից հանդիսանում է Հաշվապահների միջազգային դաշնության թղթակից անդամ։

2020թ․-ին Պալատը հավատարմագրվել է որպես մասնագիտացված կառույց և Պալատին պատվիրակվել են հաշվապահական հաշվառման ու աուդիտորական գործունեության ոլորտներում պետական կարգավորման գործառույթներ։

2021թ․-ին Պալատի և ԱՊՀ ու ԵԱՏՄ երկրների մասնագիտացված կառույցների մասնակցությամբ ստեղծվեց Հաշվապահների և աուդիտորների Եվրասիական խումբը, ինչպես նաև Եվրասիական տնտեսական միության աուդիտորների Խորհրդատվական մարմինը։

Պալատը հավատարմագրված միակ մասնագիտացված կառույցն է, որին 2020թ․-ից փոխանցվել են Հայաստանում հաշվապահական հաշվառման ու աուդիտորական գործունեության ոլորտներում պետական կարգավորման մի շարք կարևոր գործառույթներ, մասնավորապես՝ աուդիտորի և փորձագետ հաշվապահի որակավորումների շնորհում, շարունակական մասնագիտական զարգացման պահանջների սահմանում և վերահսկում, աուդիտորական կազմակերպությունների կողմից մատուցվող ծառայությունների որակի հսկողության և օրենքով սահմանված այլ պահանջների պահպանման արտաքին գնահատում, կարգապահական պատասխանատվության միջոցների կիրառում, մասնագիտական հանրության ռեեստրի վարում:

Պալատին անդամակցում են 692 անդամ, այդ թվում՝
251 աուդիտոր
408 փորձագետ հաշվապահ
33 աուդիտորական կազմակերպություն։